好多政商界名人都潮玩iPhone 4，好似白鴿黨立法會議員甘乃威都唔執輸買咗部。甘威尋日喺立法會揸住部銀藍色、閃令令嘅iPhone 4，仲好得戚咁話香港首日推出行貨時，佢搶先買咗，仲有份參加電訊商喺山頂舉行嘅派對，派對有嘢食有嘢玩，並且有明星睇添！
甘威之前都係用iPhone，換機後賣咗部機套現兩千蚊，佢話iPhone 4依家有價有市，聽講賣上深圳可以值成萬蚊喎。至於佢用緊嘅機殼就喺深圳買，盛惠三十蚊，上面仲貼住囡囡送嘅「Don't Touch」貼紙添！莫非想提醒佢咪手多多？
佢愈講愈風騷，寸埋黨嘅資訊科技及廣播政策副發言人「高達」李永達，話高達要黨友不斷叫先肯買智能手機，佢有資格取而代之。
講開近排好多人話會考慮選「超級區議會」議席，做過多屆區議員嘅甘威就話，依家談論參選超級區會係嘥氣，因為首要係贏到區議會議席先，仲話區議會唔係靠選舉工程就選到，事關「猛虎不及地頭蟲」喎！