孫太尋日話上海依家天氣仲係好熱，最高有成攝氏四十度，真係曬到人都溶，好彩呢幾日落咗幾陣雨，天氣先至冇咁熱。但係就算幾熱，都冇影響到佢哋參觀世博嘅熱情，世博會主辦單位仲非常之有心，尋日特登提早個半鐘開園，又安排特別通道畀孫公、孫太同香港學生入園參觀，等佢哋一行人唔使排隊排到天黑，可以睇多幾個館，包括中國館、香港館同日本館等。

除咗啲新科技展品令大家嘆為觀止外，孫太仲話香港學生嘅表現都令佢眼前一亮，事關咁大批學生喺埋一齊唔單止冇嘈冇亂，仲好鬼乖添，去到邊都好有秩序，完全冇失禮香港，真係值得一讚。佢哋仲一齊食晚飯，交流吓今次遊世博嘅見聞添。