近年社會怨氣爆晒燈，仇富心理嚴重，有錢人亦唔見得一定快樂，所以學佛近三十年嘅楊釗，希望借今次論壇用佛學嘅智慧令大眾反思人生意義。佢話見到比自己強嘅人，唔好妒忌，應該用一種隨喜嘅心去對待，欣賞人哋成功之處；相反對條件冇自己咁好嘅人，亦唔好討厭，應該盡力幫助對方。

楊釗同潘宗光為今次論壇，請嚟多位兩岸四地具代表性嘅佛門代表，包括禪宗六大祖庭、中國四大菩薩名剎、台灣同香港各佛山名寺方丈，以及中國八大長老等，其中從未參加過呢類型盛會嘅夢參長老都會出席。

每次見親楊釗都總係充滿正能量，佢話因為自己擁有兩個戶口，一個用嚟積存名、利同社會地位，另一個就係用嚟儲存家庭、健康同快樂，因此心靈同物質都同樣豐富，可惜呢兩個戶口冇得兌換，所以佢希望大家喺追求物質嘅同時，千祈唔好忽略為心靈戶口存款。