阿魚林鄭 獲另眼相看

有記者問謝志峰對出席節目嘅高官有乜評價，佢好感慨咁話，印象較為深刻嘅只有政制及內地事務局局長「林公公」林瑞麟、發展局局長林鄭月娥，同埋已退休嘅社會福利署前署長「阿魚」余志穩。

阿魚係好官人人都知，但因乜連成日畀班立法會議員鬧爆係人肉錄音機嘅林公公都有份？謝志峰解釋，林公公之前出席有關「五區公投」嘅論壇時雖然受到圍攻，但係面無懼色，好清楚咁闡述政府立場，佢覺得呢樣係身為高官應有嘅風範，林公公肯面對群眾，所以抵讚。

至於林鄭，謝志峰記得喺皇后碼頭保育戰之中，節目搬咗去現場做直播，佢當時都擔心未必請到政府代表出席，點知林鄭二話不說就答應，喺論壇上同現場絕食嘅保育人士直接溝通，令身為主持人嘅佢另眼相看。佢仲提到到咗今時今日，好多政府官員對出席公開論壇仍然係躊躇不前、嫌三嫌四，總之就多多藉口推辭啦！

隔山打牛 寸政府卸責

呵！唔怪之得佢讚林公公啦，原來佢係隔山打牛，借讚林公公嚟踩其餘嗰十個局長唔肯面向群眾。咁又係嘅，正如醫療衞生咁多甩漏，又唔見「每周一鑊」嘅食物及衞生局局長周一嶽出席論壇去解吓畫或者推銷政策，就連最貼近民情嘅民政事務局局長曾德成都唔見影。

喺過去一年，紅衫軍嘅出現令論壇生色不少，謝志峰將呢個現象解讀為「政府既有溝通渠道淤塞，市民被迫透過媒體」發聲，佢希望相關部門正視呢個問題，唔好將責任推落個節目同港台身上。

踩完班局長，再踩埋成個政府喎！但佢咁講亦不無道理。正正因為政府輕視同年輕人溝通以及諮詢方式落後，所以先會發生早前高鐵撥款一役，大批「80後」青年圍堵立法會大樓，仲發生警民衝突添！早前政改方案亦有類似嘅情況，搞成咁都係政府嘅錯。