庫房水浸有幾「嚴重」？統計數字一目了然。淨係本年度頭四個幾月嘅賣地收入已接近三百四十億，超過九七至九八年樓市高峰期嘅全年數字；計埋補地價等嘅總地價收入有近五百二十三億，遠超二月份預算案嘅全年預測，離歷史高峰只差百幾億。餘下七個幾月總地價收入打破歷史紀錄可以話定過抬油。齋睇統計數據，已經知財政司司長曾俊華又衰多鑊，錯到離晒譜。

係人都知鬍鬚曾計錯數當食生菜，預咗啦。本來，財政預算稍為保守無可厚非，弊在年年預算年年「失算」，無論對制訂政策、規劃發展定係改善民生，都毫無參考價值，擺明係搵市民笨。

叮！龐大嘅賣地收入屬於全港市民，唔係港府嘅私己錢，一定要用得其所。當局絕對唔可以賺咗錢又唔使，收收埋埋做守財奴。總之一句講晒，就係還富於民！

賣地成績理想，樓價繼續飆升，連帶其他生活開支水漲船高。市民唔止住唔起，連開飯都成問題。家陣除咗人工唔加，幾乎樣樣加價，普羅市民百上加斤。嗱，年初以來電費、煤氣、港鐵、西隧開始輪流加價，巴士同電車亦申請緊加價，而且加幅不菲。

查實，本港六月份整體消費物價指數已達到百分之二點八，高於絕大部分打工仔嘅加薪幅度。內地供港食品價格升勢未止，港人更有切膚之痛。呢，近排冰鮮雞批發價已經漲價三成，零售價必升無疑，中秋嗰陣市民分分鐘連冰鮮雞都食唔起。就算唔加價，同樣價錢出街食個早餐，以前有「火腿雙蛋」，家陣得番「腸仔加蛋」，死未？

叮！通脹猛如虎，窮人最痛苦。高官權貴就話濕濕碎啫，低下層市民生活開支佔人工比重大，交通及食品狂加價，簡直攞命。港府坐擁豐厚財政資源都唔幫佢哋，自欺欺人噏乜鬼通脹「溫和」不特止，公共事業加價幾乎逢申請必批准，咁同火上加油有乜分別？

賣地收入創新高，港府大把嘢應該做、可以做。嗱，當局正就下一份施政報告諮詢民意，到時除咗派吓糖，解決低下階層嘅燃眉之急外，最實際係制訂一套還富於民嘅長遠規劃，保證賣地收入取之於港，用之於民。

計太一叮話齋，貧富懸殊惡化，如果庫房水浸都唔透過為民紓困嚟「排洪」，政府愈來愈肥，民怨愈積愈多，遲早好似堰塞湖咁瞬間崩堤。叮！