全國政協委員盧文端每逢長假期都會「一拖四」帶太太、細女Amanda、外父同外母去旅行，今年農曆年去新加坡玩咗一個禮拜，氹到外父好開心。上月暑假一開始，佢又豪花幾十萬元帶隊去歐洲玩十八日，期間仲參加咗十四日地中海郵輪假期，旅程一直都好暢順，點知到訪摩納哥蒙地卡羅一個賭場時，竟然食閉門羹。
點解？話說佢去到蒙地卡羅賭場時，兌換咗三千美元諗住入場碰吓運氣，點知賭場要客人遵守衣着規格，好似佢哋一身短衫、短褲、涼鞋嘅旅遊Look，就被拒絕進場，惟有改到附近地方行吓。
地中海郵輪假期都有好多唔同行程，大部分盧文端都去過，但佢話呢次旅程比較辛苦，要着波鞋行吓山路，欣賞小鎮風情，睇嘅嘢同大城市截然不同。至於郵輪上用餐，佢話啲西班牙菜都可以接受，好似海鮮飯以地道製法，啲飯半生熟較硬身，海鮮就好新鮮。咁郵輪同香港嘅海鮮飯，邊度好食啲？佢就話各有各好食喎！