政改方案一役令泛民黨派內部矛盾沒完沒了，其中公文袋立法會議員湯家驊同其他黨友嘅關係就好疏離，雖然政改事過境遷，但矛盾仍抹唔去。湯家驊尋日同傳媒講起自己個黨就顯得心灰意冷，最新鮮嘅例子係佢前排去西藏遇着高山反應，竟然冇乜黨友慰問佢。
湯家驊話將會同白鴿黨協調，睇吓可唔可以下屆出選將軍澳一個區會選區，希望拎超級區會議席嘅入場券。不過，最終可唔可以選區議會都要個黨決定，湯家驊話知道黨內有唔少人不滿佢唔撐「五區公投」，可能最後會留難佢都未定，若果真係咁，都真係幾冇癮。
佢之後又勁數公文袋嘅不是，話喺「五區公投」事件上，個黨表現得心高氣傲，有時仲眼光淺窄添。點解唔索性退黨呢？佢話現階段佢唔會諗呢個問題，因為唔想掉低新界東一班兄弟姊妹喎。咁即係對個黨冇晒感情啦，個黨樣樣嘢都睇唔順眼，搞到咁嘅田地，仲唔退黨等幾時？