民協早幾年開始搞社企幫班基層市民就業，可惜頭頭碰着黑。好似佢哋喺○二年第一間成立嘅社企「民協三行」，今年初就畀自己友官世亮穿櫃桶底，最後仲搞到上法庭；而早於年幾前已構思喺工廠區開咖啡店嘅大計，點知又畀政府嘅「活化工廈」政策跣死，差啲畀直線上升嘅租金搞到胎死腹中；最近就連做咗年幾兩年嘅樓上按摩院，都因生意不景要摺埋。
真係好黑仔喎！民協有見及此，決定進軍殯儀業，實行嚟個絕地翻身！民協中人話，該黨喺地區經常遇到一啲受制於中國傳統思想嘅老人家，因為唔想喺生前計劃身後事，最後搞到臨終都要畀人趁機掠一筆，一啲無親無故嘅老人家就更慘情，所以希望做番啲嘢，幫班長者提供一條龍兼價錢更相宜嘅殯儀服務。
佢哋仲揚言乜儀式乜宗教都搞得，連依家外國好流行嘅「開心殯儀」都諗得過，希望可以歡歡樂樂、體體面面咁送老人家最後一程，但就坦言大家都係殯儀業嘅門外漢，都要靠一啲善心嘅行家幫手。
其實民協予人嘅感覺都係比較老餅，比其他政黨較少新猷、新血，話唔定佢哋喺地區搞呢啲咁「潮」嘅「開心殯儀」，幫到班地區長者之餘，更可以幫民協殺出一條新血路都未定！