香港人有創意、有才華，去到邊度發展都冇有怕。美國《福布斯》雜誌啱啱選出「廿五位美籍華人商界翹楚」，有四個香港人入圍，包括兩個理工大學校友、著名時裝設計師譚燕玉（Vivienne Tam）同電影《史力加III》導演許誠毅，仲有華美銀行董事長吳建民、軟件公司Sybase主席John Chen，真係可喜可賀。
呢個殊榮喺○八年首次公布，當時吳建民同John Chen已入圍，其他得獎人包括著名導演李安，同埋雅虎創辦人楊致遠，而今次譚燕玉同許誠毅入選，證明有唔同才華嘅人都可以喺商界大展拳腳。
譚燕玉係理大前身、理工學院一九七八年設計學高級文憑嘅畢業生，之後去咗紐約開展時裝事業，九四年創立以自己個名命名嘅品牌。而許誠毅就係理工學院八四年平面設計課程畢業生，八九年去荷里活打江山，係《史力加I》嘅動畫總監，之後仲做埋《史力加III》嘅聯合導演。