何鍾泰早前出席美國萬通小太空人計劃活動，望住一班年紀輕輕已對答如流嘅小朋友，佢不禁有所感觸，話呢個計劃十二年前開始搞，佢由第一屆評審做到依家，覺得依家年輕一代好醒目，有大人「估佢唔到」嘅自信同急才，要喺幾千位報名者挑選六位出嚟，令佢愈嚟愈頭痛。

做評審做得咁長情，做立會議員係咪一樣先？何鍾泰堅稱自己連續十四年冇放假，上屆已經想退落嚟，可惜搵唔到人接班。佢仲話已打晒鑼搵歷任嘅工程師學會會長幫手搵人，但仍然未搵到喎。如果又搵唔到，點辦呢？佢話對連任持開放態度喎。咁講法，佢都係準備「升呢」到二十年都冇假放囉。