結合發展 可促進經濟

西九文化區管理局會喺聽日展開第二階段嘅公眾參與活動，活動為期三個月，喺揭幕禮上更會首度公開西九文化區嘅概念圖則方案。西九文化區好似進行得如火如荼，但有文化創意業界人士就踢爆，話西九項目除咗硬件設計叫做見得人之外，所有軟件配套仍然處於嚴重落後嘅階段。

政務司司長唐唐尋日就十月施政報告諮詢文化創意產業界嘅意見。曾經做過西九諮詢委員會表演藝術與旅遊小組成員、春天舞台劇製作有限公司行政總裁高志森會後提到，業界普遍都反映覺得西九項目到依家仍然只得硬件設計，但就冇軟件配合，大家對此都好唔滿意。

到底所謂嘅軟件係乜呢？高志森解釋，軟件所指嘅範圍好廣，包括教育、人才培訓同埋觀眾及節目內容嘅培養等等。佢仲提到西九項目應該同經濟發展互相結合，咁樣藝術發展可以得到助益之外，仲可以促進經濟，可以話係相得益彰。

佢又透露，即使係一套普普通通嘅舞台劇，已經可以創造好多就業職位，好似運輸、服裝同舞台製作等，如果搞得好，對香港經濟好有幫助。雖然之前曾經有人質疑香港欣賞藝術嘅觀眾數字唔夠，令到西九項目會蝕好多錢，佢就唔係好同意，話香港識得欣賞藝術嘅人其實唔少，加上內地珠三角呢個龐大市場，觀眾數字絕對唔成問題，好可惜政府至今仍然乜都冇做，亦冇任何政策配合，擔心觀眾最終因為咁流失。

後知後覺 盞淪大白象

換言之，高志森係寸爆政府冇食腦，西九文化區大有吸商機嘅機會，亦可以「吸水」，但係政府仲係後知後覺，乜都冇諗過，睇嚟佢係想鞭策政府咪喺度自我感覺良好，唔通等西九文化區又變成另一個大白象工程咩！唐唐亦係西九文化區管理局董事局主席，聽到業界咁講唔知有乜嘢感想呢？

高志森最後都仲好畀面政府，話政府可能一早已經有全盤計劃，但係仲未公布啫，佢希望如果真係有晒計劃嘅話，就唔該盡快公布，釋除業界疑慮咁話。聽到未？政府再歎慢板實畀人鬧爆！