【本報訊】「佢（死者）尋晚好地地出咗去玩，點會諗到咁都出事？」慘被捅腹喪命的青年張健龍，原來絕少夜蒲，平日半工讀進修自我增值，卻因難得放假，終於應約與友人到酒吧遣興，詎料遭逢橫禍。死者父親痛失愛兒，帶淚哭問：「點解會咁？」
洋名Kinno的阿龍，乃家中獨子，住大嶼山貝澳鹹田舊村，父母為退休人士，張父患有白內障，雖做過手術，但視力受損已喪失工作能力。阿龍胞姊較死者年長一歲，自修成材，剛於公開大學畢業，阿龍受胞姊影響，踏入社會後仍繼續進修，現報讀工商管理課程，希望以知識改變命運，改善家人生活環境。
據張父表示，兒子從事維修工程散工，月入近萬元，為家庭經濟支柱。他近日在喜靈洲懲教所工作，昨日因有高官巡倉，着他們停工一天，阿龍因此應約於前晚到尖沙咀蒲吧，不料一去不返。
昨午一時許，三十多名親友趕赴醫院送阿龍最後一程，有人哀傷落淚，張父與兩女親友陪同亡兒遺體送落殮房，期間一名女子聲淚俱下大叫：「健龍，放心啦，記得返屋企呀！」聞者心酸。