呢位張婆婆平日擺賣指甲鉗等小貨物幫補家用，街坊見佢年老體弱，周時會幫襯。不過呢碗飯唔容易食㗎，張婆婆上個月已被食環署票控過一次，貨物充公不特止，仲要罰款，損失慘重。

見過鬼邊個唔怕黑吖，張婆婆惟有小心翼翼，但始終難逃厄運。尋日一早，成十名食環署人員殺到，話要票控佢阻街同埋無牌擺賣。張婆婆聽到「票控」，擔心血本無歸，當場情緒失控，跪低苦苦要求對方「畀次機會」。

見到咁嘅場面，係人都會心軟啦，但無論婆婆點樣苦苦哀求，食環署人員都無動於衷，堅持要採取拘捕行動。好多圍觀者睇唔過眼，為婆婆求情，有位老伯仲企出嚟話：「你哋要拉阿婆，就拉我先！」卒之搞到發生碰撞事件，據講有食環署職員受傷，阿伯亦被警方拘捕，婆婆嘅貨物就被搬走晒。

計太一叮話齋，拉阻街小販唔係唔啱，不過食環署使唔使去到咁盡呀？俗語有話，有頭髮冇人想做瘌痢，如果唔係生活所迫，七老八十嘅人邊個仲會喺街邊擺檔呀？阿婆冇偷冇搶，無非想搵番少少錢幫補家計啫，點解唔可以留條生路畀佢行，要趕盡殺絕？

正如立法會議員王國興話齋：長者自力更生唔靠政府唔靠家人，政府應該獎勵佢哋，而唔係咄咄逼人。年老通街販賣已夠辛苦，當局咁都唔酌情畀啲生存空間佢哋。

食環署應該設身處地為長者着想吓，就算係執法，態度都要好啲吖嘛。之不過，同呢班人講道理，直情係對牛彈琴。事關佢哋不嬲對弱勢社群蝦蝦霸霸，點會有同理心吖？

類似畸士多到數唔清，中環嗰班擦鞋阿伯就被趕到冇碇企。食環署野蠻執法大失人心，成千市民聯署支持擦鞋阿伯，要求政府發牌畀佢哋，政府最終都要讓步。本來經過咁多事，食環署都應吸取教訓啦，可惜佢哋死性不改，不斷激起新嘅民怨。

如果見到食環署連年老體弱嘅小販都唔放過，就以為佢哋好勤力，咁就大錯特錯嘞。其實食環署人員好多都係大懶蛇，返工時間居然夠膽去飲茶睇戲練功，有啲仲返屋企大覺瞓，但係叫佢哋做正經事就難咯，比如現時滿街都係易拉架推銷檔攤，食環署始終搞唔掂。佢哋搵幾個長者開刀，只係為咗表明自己有做嘢咋。

叮，呢班廢柴不務正業，仲搞到民怨四起，納稅人嘅錢實在使得太冤枉咯！