面前的Angela看來只有一百餘磅，訪問一句鐘過去，她的手一直安分地擺放枱面，腰板挺直，說話淡定：「以前我係肥妹，喺加拿大讀大學時最肥，有一百二十二磅！」減磅秘訣為何？「食物要低糖少油，仲要做運動……」這位專業營養師曾亮相電視台節目，又在報紙專欄撰寫文章，背後的軍師，原來是爸爸李廣林。
小時嘗盡新潮零食
Angela自小在中、上環長大，十歲左右，放學不是立即回家做功課，而是先到父親經營的食物批發公司「通泰行」揀零食：「幾兄妹會一齊去拎，香腸、波板糖、珍寶珠都係至愛。」有時，父親代理的新產品，亦由三兄兩妹當白老鼠，率先嘗到全港最新最潮的零食。生在食品之家，Angela對食物製作漸感興趣：「麵粉本身唔好食，但撈吓呢樣溝吓嗰樣，就變成唔同嘅美食，當時覺得好得意！」正因如此，Angela在大學便選擇了修讀食物科學及營養學。
從加拿大學成歸來，除講飲講食，Angela還會講煮。她炮製的健康餸菜「禮尚往來」，白老鼠當然是父母及兄妹：「試過整葡國雞，人哋用花奶、椰汁，我改用脫脂奶。」不過，家人的食評慘不忍睹：「我惟有加少少花奶啦！」她見父親身形「發福」，更為他度身訂造餐單，「一個月就減咗三磅，但佢話味道淡，唔習慣。」
生意策略好味抵食
營養中心開業至今，足足四年了，是一番心血，但父親背後的金錢和精神上支持，功不可沒。Angela說，不止如此，父親更親授生意策略：「無論賣糧油、零食，都唔想啲客食一次就冇回頭，你啲嘢好味又抵食，客人先唔會走。」雖然這些都是簡單道理，但當中包含了父親的愛和關心，對於Angela來說，至為珍貴。
李廣林曾公開評價自己是「零分」父親，但在女兒眼中卻充滿感激之情，Angela說：「佢至少有八、九分！畀咗我好多自由度做自己鍾意嘅嘢，唔使行佢鋪定嗰條路。」
李正雅小檔案
現 職
營養學家、催眠治療師、Pilates教練
學 歷
加拿大英屬哥倫比亞大學營養科學士學位、美國醫學運動會體適能導師等
家庭狀況
已婚
公 職
香港中西區婦女會副會長
港島女童軍副主席