向來都係廿四孝媽咪嘅運輸及房屋局局長Eva鄭汝樺，舊年為咗遷就兩個囡囡做暑期工同上暑期課程，延遲到八月中先放大假去旅行。今年都唔例外，佢為咗參加大女喺美國波士頓嘅大學畢業禮，提早到六月初放大假，之後一家去咗埃及旅行，但據聞佢兩個囡囡大呻又熱又辛苦。
可能Eva喺寫字樓坐得太多，所以去親旅行都揀活動量較多嘅地方，好似幾年前就去北美阿拉斯加騎馬，上山落山周身用力都咪話唔辛苦，點知今次仲激到夏天遊埃及。埃及呢幾個月最熱，氣溫高達攝氏四十幾度，酷熱難當，真係好難頂喎！
不過，睇番Eva啲埃及旅行相，見到佢哋一家人樂也融融，遊完首都開羅著名嘅吉薩（Giza）金字塔後，又到亞斯旺坐遊船暢遊尼羅河同沿途多個神殿，其中一張全家福就喺宏偉嘅Kom Ombo神廟門外所攝，一家四口個個戴晒太陽帽同太陽鏡，做足防曬措施。