IT豪話未有取態

兩名疑似特首候選人政務司司長唐唐同行政會議召集人CY梁振英磨拳擦掌，令其中兩名「散人」廠商會代表林大輝同會計界「波波」陳茂波處境尷尬，事關大輝被視為唐唐「家臣」，波波就被傳押注CY，二人立場迥異，令五散人散上加散，波波之前已經出嚟否認，但大輝就變相默認，所以五人喺現有組合好大機會出現變數。

不過，ＩT豪話特首大戰只會令散人更加綑綁喺一齊，佢強調現時五散人之中，除咗大輝由於打過唐家工而角色較為敏感同尷尬外，其他人包括波波、陳健波、「怪醫」梁家騮同IT豪自己，對特首候選人或者疑似候選人都未有任何取態，視乎有心人日後「亮劍」時所提嘅選舉政綱同拉票攻勢，先作出抉擇。為咗增強政治能量，四人極大機會綑綁一齊，作為向未來特首候選人叫價嘅籌碼，為界別爭取權益。

散人不散，的確可提高身價，但點講五散人都係愈嚟愈散喎。按IT豪嘅邏輯，五散人有機會共同進退撐同一個候選人，但亦有機會出現一個局面，就係大家各有各撐。