莫醫生就謙稱廚藝唔及醫術，但見佢手勢好純熟，先將烏魚子煎到甘香再刨碎，跟住落鍋爆香蒜泥同Porcini（牛肝菌），最後處理扁意粉，時間控制得宜，識食嘅鄧達智嚟評分時都忍唔住攞條意粉試食。

看見梁兆基將「百花春雞」上碟時個嚴肅樣，睇得出佢相當專業，難怪攞咗四個獎。

「趙樓神」炮製嘅「富甲黃金雞」攞到「賣相家」獎，都算有交代。

至於梁兆基嘅百花春雞攞咗一個「創意家」同三個「味道家」獎。百花春雞工序繁瑣，見佢細心將春雞起骨，再釀入蝦膠，跟住隔水蒸再埋芡汁，過程冷靜，完全冇受現場嘅緊張氣氛影響。佢話呢個菜式係年前睇電視學返嚟，失敗多次，只有七、八次成功，但辛苦都抵嘅，事關味道好到評判梁文韜都以為佢搵師傅嚟幫手。

趙樓神就最有速度，佢話賣樓最怕就係「炒燶」，所以控制火候好重要，難怪佢個贏得「賣相家」獎嘅「富甲黃金雞」最快上碟，之後仲有時間去幫戰友打氣。

女將陳淑莊嘅「番茄海鮮意粉」亦攞到「賣相家」獎，大會仲特別加個「滿頭大汗獎」畀佢添！