廠商會前會長尹德勝退下火線後專心玩相機，最近迷上影人像，尋日佢話上星期跟咗去由o靚模鼻祖Chrissie周秀娜帶團嘅「盤龍峽G模攝影團」，影足千幾張相返嚟，到依家都未執好。佢仲自爆曾經靜雞雞同o靚模Chrissie同埋DaDa講：「過嚟同Uncle影張相吖！」佢哋兩個都好爽快咁應承，但搭住佢哋膊頭時就畀在場嘅工作人員制止。
尹德勝話影人像好高難度，要模特兒同天氣都配合先影到靚相，一定要多多練習，所以當有朋友問佢有冇興趣參加盤龍峽攝影團時，佢就一口應承咗。尹德勝話個團都幾舟車勞頓，車程加船程超過六個鐘，不過之後可以影足兩日相，所以覺得都幾抵。
今次同行有七個o靚模，佢以攝影師身份話唔係個個都識擺甫士，加上工作人員劃嘅攝影區有時背光，所以啲相幾難影喎！佢仲話大家唔應該歧視o靚模，應該當係一份正當職業咁看待；不過一到攝影團嘅記者採訪時間，尹德勝就即刻閃人，話費事畀記者認到會尷尬喎！