喺轉軚支持政改方案後，白鴿黨畀策動變相「公投」嘅公社兩黨鬧爆「賣港、賣黨、賣民主」，社民連仲連番質疑白鴿黨走向建制。為咗洗底，白鴿黨喺政改方案獲立法會通過後，諗咗「三招」洗底，首先要向外盡量澄清同解釋白鴿黨喺政改轉軚嘅理由；其二係唔接受政府委任公職，以免變咗死亡之吻，正如早前堅拒受勳；最後係搵一啲政策去反對，仲要旗幟鮮明、公開大聲反對，所以佢哋早前就係咁狙擊天匯同樓市政策。

經過個多月似乎有啲效果，起碼有啲民調顯示白鴿黨支持度上升，睇嚟市民已經消化咗對白鴿黨嘅負面印象。不過若果白鴿黨因此而沾沾自喜，似乎開心得太早，亦太天真，事關佢哋係咪真係洗到底，就要睇施政報告一役嘞！

以示同政府劃清界線

據聞，近日政府就施政報告進行諮詢，白鴿黨仲未敲定建議內容，就要諗計點樣甩身，無論到時政府派幾多糖，佢哋都要喺施政報告嘅字裏行間捐窿捐罅，總之就要搵啲嘢出嚟反對，預計施政報告會交代房屋問題，斷估天匯同樓市政策都未必交到貨，咁佢哋就有反對嘅理由。

黨內有口痕友話，白鴿黨對施政報告投贊成票完全冇可能，投棄權票都死，必定畀其他泛民黨派鬧爆佢哋同政府擁抱，指佢哋係走入建制嘅一大例證，所以白鴿黨可以話騎虎難下，焗住要投反對票，以示同政府劃清界線，保住佢哋繼續扮演反對黨嘅角色。

立法會每年都會就施政報告進行致謝動議嘅辯論，若果白鴿黨喺致謝動議投反對票，再加上其他泛民政黨都會投反對票嘅話，動議喺分組點票下必定被否決，咁即係話施政報告唔獲得立法會致謝，再次顯示政府施政不得民心。