現時香港人生活方式改變咗，逢年過節豐儉由人，唔一定要食九大簋，年關已經唔難過，反而新學年開學先至係最大嘅難關。香港話就話實行十二年免費教育，但係各式各樣收費多籮籮，書簿費、校服費、校巴費、課外活動費，數都數唔晒，學生家長不勝負荷，尤其低下階層家庭，更係索晒氣。

近排加風四起，令今年嘅開學關更難過。嗱，校服平均加價五至八巴仙，校巴加票價，增幅五至十巴仙咁多，各種雜費亦要加。有細路入讀幼稚園嘅家庭更閉翳，有調查發現，八成五幼稚園家長都收到加學費嘅通知，一加就加一成咁多。

呢度加一啲，嗰度加一啲，計計埋埋個數都唔細，令貧窮家庭百上加斤。社區組織協會上月訪問咗一百多個月入只有六千七百元左右嘅家庭，發現今年每個家庭要為每名子女支付二千三百元開學費用，佔家庭收入嘅三分之一，屋企細路多嘅，就更加辛苦。好似有位馮女士有四個仔女，今年入學費用一共要一萬二千幾元，而全家就靠佢丈夫一萬元人工生活，交咗開學費用就分文不剩，唔通唔食飯咩？惟有向鄰居借錢應付啦。

另一位家長眼見校服費勁升，惟有幫個仔買咗最大碼嘅校服，希望可以着多幾年，個仔就慘咯，有次追巴士跑跑吓差啲甩褲，簡直無地自容。更令佢唔開心嘅，係因為冇錢，被迫放棄心愛嘅跆拳道。

大家可能會問，政府唔係有派發津貼咩？冇錯，政府的而且確向困難家庭學生發放學費津貼同書簿津貼。學生資助辦事處仲話，今年會向有特別需要嘅學生提早發放新學年嘅八成津貼，又話會擴展計劃，主動邀請多啲家庭申請，透過入息審查增加受惠學生人數咁話。

嘩，真係及時雨！政府咁關心困難家庭學生，實在令人感動。可惜口惠實不至，有社工團體踢爆，因為申請津貼門檻太高，令好多學生得唔到應有嘅照顧。點會咁㗎？原來問題出喺入息審查制度，家庭入息限額居然比貧窮線仲低四分之一，離唔離譜啲呀？

政府咁搞法，直情玩殘低下階層家庭。據統計，全港有二十幾萬收入低於綜援家庭嘅學生，但只有十萬人獲全免書簿費。難為當局仲好意思話，要幫助更多困難家庭學生，真係吹水唔抹嘴。

實際上，好多家庭喺開學前幾個月就被迫開始節衣縮食慳開學費用。所以，你話開學關係咪慘過鬼門關呀？叮！