政府以高薪聘請返嚟嗰支「八國聯軍」，十八個副局長同政治助理上任近兩年嚟，表現不濟兼屢爆醜聞，理應減人工甚至炒魷，但政府早前公布佢哋嘅表現同薪酬中期檢討，只對佢哋一刀切凍薪，個個唔使減薪。
環境局副局長潘潔喺報告出街當日出席港區婦聯代表聯誼會晚會時，以背書方式回應凍薪感受，拋低咗十六個字：「細心聆聽，努力工作，盡心盡力，服務市民。」
政治任命官員唔單止要識得推銷政策，更要識得推銷自己，以前有立法會議員喺議事廳都鬧過話同佢溝通唔到，推銷政策亦曾試過同佢老闆、局長邱騰華唔夾嘴形，呢次佢又冷冰冰咁背書回應凍薪，佢嘅政治公關手段有幾高明，相信大家都心知肚明。