中國外交部駐港特派專員呂新華已經喺香港工作咗四年，最近佢接受電台訪問時笑言，做佢老婆一啲唔容易o架，事關佢經常因工作關係而走嚟走去，足迹遍布全球一百五十幾個國家，作為「跟得夫人」自然要跟住佢四圍走啦，仲要同唔同領事夫人打交道添！
呂新華早前接受香港電台訪問時話，專員呢個位嘅任期一般都係三至四年，但係因為佢六十歲都未到，故此任期會比前任長一啲，亦相信係至今做得最耐嗰位，即使做到退休都願意咁話。其實佢出年就足六十歲，提到佢會留喺呢個崗位做到幾時，佢就好謹慎咁話呢樣嘢就要睇國家安排喇！果然政治正確。
講到太太張靜婭，呂新華有讚冇彈，話多年嚟派駐過唔同國家，太太陪住佢周遊列國，而且要出席各種宴會，同其他領事夫人打交道，所以身為特派員夫人絕唔容易！