二○○八年退出富貴黨自立門戶嘅經濟動力（4L），一直銳意擴大議會中嘅政治能量，蟄伏多時，尋日終於有新動作，宣告敲定派出十人或以上搶攻明年區議會選舉，以此表明佢哋唔會獨沽一味專煲功能組別，而係兩條腿走路，兼顧直選戰場。
4L核心Jeffrey林健鋒尋日講開仇富問題，話香港人其實愛富求富，對弱勢社群，工商界一直想搞扶貧基金，但佢唔同意由政黨中人嚟搞，因為會令事件政治化。呢句話矛頭直指近期傳出幫「大孖沙」籌備商界扶貧基金嘅富貴黨前主席田北俊。
辣完富貴黨，Jeffrey同Andrew梁君彥連其他平日冇乜牙齒印嘅政黨都明批暗諷一番。例如講到4L嘅區選攻勢嗰陣，就強調唔會靠派糉攞選票，暗寸專走街坊路線嘅基層政黨建仔；又指白鴿黨主席鐵頭仁掛名做黨嘅工商政策發言人，但佢對中小企唔熟，點樣有代表性呀？
至於公文袋黨魁余若薇要求將實習生納入最低工資規管範圍，Jeffrey就話變相鼓勵僱主以後唔請實習生啫。嘩！區會選戰未開波，經濟動力已經四圍點火頭，仲搞到好似火燒連環船咁，一副戰鬥格咁喎！之不過，行軍大將唔係齋噏嘅，要食腦、精通兵法同靠實力o架！