幾年前同醫院管理局打官司一鳴驚人嘅「怪醫」梁家騮，炒紅之後再下一城喺○八年循立法會醫學界功能組別選舉成功進身議會，雖則做議會工作要花好多時間，但係佢仍然留番喺公立醫院工作，勢估唔到近期佢密謀外闖搵真銀喎！
返立法會唔使過馬路
冚得密實又點吖！怪醫確實即將離開佢做咗二十四年嘅威爾斯親王醫院，今年十月同大佢三年嘅哥哥、私家骨科醫生梁家騏喺中環太子大廈開診，兩兄弟孖住搵食。
怪醫話決定出嚟開檔唔係一朝一夕嘅事，原因有好多個，而希望喺外邊有多啲發展空間就係真嘅，仲有就係可以做好份工之餘，也可兼顧議會工作，所以揀太子大廈開檔，穿過皇后像廣場就到立法會，連馬路都唔使過添！
本身係外科醫生嘅怪醫話，唔單只公立醫院病人要輪候做手術，公立醫院醫生都要輪候手術室做嘢，所以希望喺私營市場做多啲手術。
繼續發聲撐公院醫生
跳出醫管局，係咪意味以後少啲為公立醫院醫生發聲呢？咁又唔係喎！怪醫話公立醫院醫生嘅工作時間好長，立法會早前都話要為佢哋訂立標準工時啦，所以佢會繼續跟進有關事件，而佢相信要搞掂呢單嘢都要三至四年時間。吓！咪過咗呢屆立法會會期都未搞掂？係咪意味佢喺下屆會競逐連任呢？
佢間診所有近一千呎，裝修費閒閒哋四、五十萬元，佢相信喺醫管局筆公積金夠用，未來兩個月要準備開診同請姑娘。唔少外科醫生由公立醫院出嚟私人執業，月入過百萬，甚至一個禮拜賺一百萬元，佢就話冇咁樂觀。