叮！既然表現符合要求，應該加薪至啱㗎，點解要凍薪呢？唔好唔記得，今年全體公務員已經加咗人工，尤其係首長級公務員加得仲多添，可以話係人人有份，皆大歡喜。咁因乜事同樣係為政府打工，而且「表現符合要求」嘅副局政助冇份呢？唔怪得連前公務員事務局局長王永平亦表示難以理解。

計太一叮話齋，其實都唔係咁難理解啫。事關所謂表現符合要求，不過係當局自說自話，自吹自擂，根本唔係事實，不如聽吓社會各界又點講嘞。呢，較早前有電台向立法會議員發問卷，請佢哋幫副局長及政治助理打分，結果可以用慘不忍睹嚟形容，十八名副局政助，居然有十六人肥佬，只有一個副局長及一個政治助理僅僅合格，你話係咪醜怪吖。正所謂公道自在人心，有政黨調查發現，市民普遍唔滿意呢班新貴嘅表現，近七成受訪者認為佢哋嘅表現唔合格，超過七成人贊成佢哋減人工。

嗱，呢啲先至係真正嘅民意喇，當局以凍薪來敷衍市民，根本就係掩人耳目。話時話，呢班政治新貴喺市民心目中嘅形象麻麻，唔係冇原因㗎。當初港府疊床架屋增設副局及政助時，講得不知幾好聽，話可以改善施政效率，又話可以培養政治人才，可惜落筆打三更，呢班政治新貴仲未上場就惹來連串質疑，八國聯軍治港呀、黑箱作業呀、任人唯親呀、薪酬超高呀，搞到滿城風雨，幾乎爛尾咁滯。

尤其係薪酬超高最令人不滿，有位本來月入唔夠三萬元嘅大學職員，一擔任政治政理，人工就跳升到十幾萬，簡直係天方夜譚。副局政助人工超高，如果係物有所值，納稅人都冇咁，最弊佢哋毫無貢獻不特止，仲不時爆出醜聞，添煩添亂。而最搞笑嘅係，呢班政治新貴上任至今，唔少仲係「養在深閨人未識」，好多市民依家都唔知佢哋究竟姓乜名乜。唉，副局政助嘅職責本來係協助問責局長推介及落實政策，點知佢哋一個二個玩潛水，咁又點樣做嘢呀？

一句講晒，設立副局長及政治助理根本係阿茂整餅，冇嗰樣整嗰樣，幫助政府施政就見唔到嘞，幫倒忙嘅例子就唔少。最無辜嘅就係納稅人，一年大拿拿幾千萬元供養呢班閒官，你話係咪冤枉吖。

所以話，當局要檢討嘅唔單止係呢班新貴嘅薪酬，而係整個問責制度，講得白啲，就係要認真考慮到底有冇必要繼續供養佢哋。叮！