依家好多高官輪住抖暑，畀停車熄匙立法工作搞到一頭煙嘅環境局局長邱騰華都攞咗差唔多一個月假，直到九月二號，學生開學佢先要返工。最搞笑嘅係，唔知佢係咪擔心放長假畀人話，要將假期斬開分兩次刊登政府憲報，其中一次又要出勘誤，即係為咗佢嘅假期要出三次憲報。
停車熄匙立法被搵食車司機狠批脫離現實，西貢大浪西灣自然景觀遭破壞危機又未解除，但環境局原來由本月四日至下個月二號，除咗一日邱騰華返工外，其餘日子都係副局長潘潔署任局長。潘潔要頂成個月更外，其他幾位副局都要走唔甩，民政事務局副局長許曉暉都要做替工，署理局長職務四日，由今日頂到下星期二。不過，運輸及房屋局局長鄭汝樺今個暑假到年尾都未必有假放，事關要睇實十月菜園村清場，二來復建居屋討論熾熱，隨時要出來解畫，所以佢兩個月前已提早放大假去咗埃及旅行。