政府尋日公布港台顧問委員會成員，主席係香港律師會前會長黃嘉純，係人都知港台員工好抗拒政府搞佢哋嘅架構，黃嘉純似乎都預咗呢樣嘢，所以劈頭就向員工伸友誼之手，話屋企有六部收音機，係港台粉絲，出門返工都有電腦，隨時聽番港台嘅節目，佢雖然擺出梗有一部機喺左近嘅陣勢，但工會都唔係好受，夜晚已經出聲反對成立呢個委員會。
黃嘉純喺任命公布後，同廣播處處長黃華麒一齊亮相，佢大讚港台嘅表現，仲話朝早出門口前特登數吓屋企嘅收音機，總共有六部咁多，除咗時不時有一、兩部開住外，出門都冇錯過港台嘅節目。
雖然黃嘉純十分賣力同港台拉關係，但同佢被委任為主席有乜關係呢﹖所以有記者好直接咁問，除咗屋企多收音機外，你仲有咩能力畀到港台意見呢？黃嘉純對呢個問題輕輕帶過，笑笑口話作為律師，佢好睇重言論自由同編輯自主。港台製作嘅《頭條新聞》曾被批評陰陽怪氣，主席有冇睇過呢﹖一直表現淡定嘅黃嘉純聽到呢個問題時突然耳仔都紅埋，但就冇回應，唔知佢係好鍾意睇定係未睇過呢？