本文重點
政府尋日大晒冷，以狂風掃落葉嘅方式一次公布四項重要消息，分別係港台顧問委員會同約章、副局政助檢討報告、電台播政治廣告，最牽動全城神經嘅壓抑樓市過熱措施，呢幾項政策每個都可以畀市民議論一個禮拜或更耐，但尋日就一次過推出，唔使講，政府又係出陰招，用啲重量級消息冚重量級敏感消息，避免副局政助大部分表現「肥佬」要凍薪嘅消息畀人炒熱喇。
為凍薪拆彈
尋日係十三號，係傳統嘅黑色星期五，對政府嚟講，就係禮賓府心戰室拆政治炸彈嘅大日子，結果由中午十二點十八分，廣管局出稿，裁定民建聯畀錢贊助嘅商台節目《十八仝人愛落區》同民主黨副主席劉慧卿喺電台呼籲市民參加普選大遊行嘅廣告均違反電台業務守則，各罰三萬元。政治廣告要罰，咁「起錨」點呢？政府梗係唔想人追問。
所以跟住有顧委會同副局政助報告相繼出爐，特首辦主任譚志源同政制及內地事務局局長林瑞麟下晝仲企戙戙解答副局政助嘅凍薪安排，報告呢頭派，但傳媒未及消化，四點半又輪到財爺上場，跟住係金管局出招打壓樓市，三個惹火議題梗係畀樓市冚過啦。心戰室可能以為咁樣拆彈好叻，不過，衰嘢點會冚得到呀？唔信，嚟緊幾日就知。