旅發局主席田北俊對紅酒好有研究，但對港式奶茶就似乎唔係好熟行。尋日「國際金茶王大賽2010」港式奶茶香港區決賽舉行，田少同貿發局副總裁方舜文、餐飲聯業協會會長黃家和等一齊出席，仲即場試飲各位準茶王嘅參賽作品，不過，田少話呢個重任考起佢，事關佢冇咩研究。
田少啜一啖紅酒，可以品嘗到香味、醇度同aftertaste，不過對奶茶就冇呢啲功力，田少平時去茶餐廳飲奶茶，都只係覺得入口好飲就係好嘢，所以試咗兩個參賽者作品嘅佢，直言分唔到邊杯好飲啲，總之兩杯都咁好味喎。
方舜文就鍾意濃啲、香啲同滑啲嘅奶茶，但佢唔係成日飲，撞啱周末下午有假放，佢就會去茶餐廳歎番杯奶茶、叫多個菠蘿包，因為佢覺得兩者配合係最好嘅下午茶。佢喺溫哥華都試過奶茶，仲覺得啲水準拍得住香港添，但美國就麻麻地，歐洲就直情唔興。