柴灣青年廣場耗資逾七億元打造，希望發展成後生仔女創業、飲食同潮流嘅好去處。啟用一年來，知名度漸增，依家四樓美食館已經有兩家食肆開業，包括Palco ristorante意大利餐廳同太極樓京滬飯店。有份提供意見嘅青年事務委員會主席陳振彬（Bunny）日前就親身去為食肆打氣。
佢幫襯嘅係Palco ristorante，「Palco」嘅老闆兼行政總廚Ken Lau只係三十出頭，但已入行十七年，由尖沙咀萬麗酒店學徒做起，之後到過尖沙咀半島酒店多間食肆工作，仲喺半島著名嘅Gaddi's法國餐廳深造五年，去年十月出外闖，喺美孚創業，開咗間Mia意大利粉店，直至最近進駐青年廣場。阿Ken話，創業過程絕不簡單，好彩背後有著名音樂界人士黃栢高（Paco）同Bunny默默支持。
呢一晚，阿Ken為Bunny悉心炮製多味精選菜式，包括黑松露野菌忌廉湯、鮮蟹肉番茄牛油果沙律、澳洲塔斯馬尼亞生蠔、龍蝦米多配魚子意大利麵、青蘋果鵝肝、紅酒會極黑和牛面珠、低溫慢煮雞胸同油浸雞髀，仲有甜品朱古力梳乎厘，Bunny食完讚不絕口。