本港一年四次按季度公布經濟數據，尋日係公布第二季經濟數據嘅日子，呢個記者會過去多由政府經濟顧問擔綱，只有金融海嘯等嚴重經濟災難嗰陣，先見到財爺或者高官出席，但尋日晏晝，已有消息人士放風話鬍鬚曾會出席呢個記者會，仲會公布壓抑樓市炒風嘅措施。

陳李藹倫陪坐一粒鐘

結果下晝四點半，鬍鬚曾拍住陳李藹倫一齊出場，但佢一開波就搶閘，一講就半個幾鐘，雖然係非熟手數據技工，佢都交代咗幾個主要經濟數據，然後就跳咗去大講壓抑樓市措施，陳李藹倫陪坐近一個鐘，到最後鬍鬚曾答咗四、五個問題走咗去，佢先講咗幾句嘢。可以話鬍鬚曾尋日騎劫呢個記者會真係超級「成功」！

其實，市民不滿樓市炒風講成年幾，政府一路以豪宅市場同市民無關拒絕出招，拖咗咁耐，搞到好多豪宅，甚至中價樓都升到去九七年嘅高位，唔知係咪鬍鬚曾終於醒覺，驚住九七年亞洲金融風暴同樓市狂插一幕重演，結果要擒擒青喺尋日公布。

講番尋日嘅經濟數據，政府雖然調高咗全年經濟增長，但香港人千祈唔好咁開心，事關新加坡上個月公布佢哋第二季經濟增長數據，人哋按季增長高達百分之十九點三，但香港嘅同期增長率就只有百分之六點五，連人哋嘅零頭都追唔上，香港經濟有幾好？醒醒喇！