人間有情，大愛無疆。短短幾個星期，十一個月大嘅茵茵由僅得半邊肺功能、臉上插滿喉管，變番健康活潑、人見人愛，完全係愛嘅奇迹。本報讀者嘅善心，令人相信呢個世界上除咗冷漠，仲有關懷，有愛就有希望。

茵茵患上先天性單邊肺部發育不全綜合症，呼吸困難，喺香港留醫超過半年未見起色。主診醫生得知台灣榮總喺兒科氣管支架置入手術方面經驗豐富，成果甚佳，諗住送茵茵去台灣醫治。但港幣四十萬嘅醫療費用，對普通打工仔嘅茵茵父母，根本係天文數字。

天無絕人之路，本報上月中報道咗茵茵嘅不幸遭遇，讀者深表同情。太陽報愛心基金同東方日報慈善基金伸出援手，登高一呼，唔止全城，直頭全球都響應，香港、台灣、澳洲、加拿大等地善心人士紛紛慷慨解囊，義助茵茵赴台治療。

截至目前，太陽報愛心基金同東方日報慈善基金已為呢次愛心大行動籌得超過港幣一百七十五萬元善款。茵茵媽媽喺「茵茵獲重生記者會」上，用「真是好神奇」嚟形容自己嘅感受，特意感謝兩個基金同醫術精湛嘅榮總，亦盛讚台灣人熱情有愛心。

講到愛心，點少得妙手回春、令茵茵重展燦爛笑容嘅台灣榮總吖？為保障手術成功，院方派出兒科專家專程來港陪病人坐醫療專機飛台北。為確保茵茵平安返港，榮總今日將再派醫生沿途護送，為愛心同希望之旅畫上完美句號。

茵茵喜獲重生，當中有唔少感人古仔。呢，有位靠生果金生活嘅七旬讀者，一千蚊生果金只留六百自用，其餘四百捐晒畀茵茵做手術。仲有，國泰航空公司高層透過本報得知茵茵嘅遭遇，主動施以援手，為佢同家人及醫療團隊免費提供往返台灣機票及各種配套設施，創下為有需要病人提供免費接載服務嘅先河。

太一叮諗起一個故事。有人問上帝，天堂同地獄有乜唔同？上帝先帶佢去地獄，好多人食緊飯，雖然每人手上有隻匙羹，但因為柄太長，無論點盡力都食得論論盡盡，搞到個個面黃肌瘦。而天堂嘅人同樣攞匙羹，不過就兩個人拍檔，用長匙羹互相餵對方食嘢，個個食得好開心。施比受更有福，呢個就係天堂同地獄嘅分別。

種善因必得善果，茵茵吉人天相，重獲新生，可喜可賀。有讀者話，睇到茵茵活力十足，重現笑容，就好似太陽出咗嚟咁。太一叮相信，各位善心讀者一定好似呢位幸運小公主咁，日日見到太陽，永遠享受陽光。