富豪二、三代好多都係含住金鎖匙出世，由細到大都衣食無憂，但康泰旅行社太子爺黃進達（Jason），自細就要接受爸爸黃士心嘅「地獄式訓練」。Jason○三年喺理大旅遊及酒店業管理系畢業後，就返康泰由低做起，無論舖面銷售以至前線導遊都做過，通過父親嚴格考核，今年九月正式接替劉美詩晉升為康泰總經理，成為康泰新一哥。
初次接觸三十出頭嘅Jason，感覺佢性格內斂同謙厚，同爸爸直腸直肚嘅招積性格好大對比。黃老闆都大讚囝囝話：「Jason好謙虛，做事夠圓滑，唔似我咁多牙齒印，但我招積有理喎！」隨住Jason逐步接班，黃老闆亦慢慢退居幕後做囝囝嘅軍師，只係就重大事情畀意見。
Jason坦言喺過去十幾年，香港經歷金融風暴、沙士同金融海嘯，對旅遊界衝擊好大，加上業界競爭大，令經營更困難，生意唔易做。不過，佢亦會繼續開闢新旅遊路線，開拓內地市場。
康泰贊助港姐令Jason聲名大噪，同新鮮出爐嘅港姐冠軍陳庭欣更傳出緋聞。Jason呼冤話完全冇啲咁嘅事。而為粉碎謠傳，黃士心篤爆囝囝已經有個固定嘅靚靚女朋友，當年仲係城大校花，已經有晒結婚計劃。