喺政府公布副局長同政治助理嘅薪酬評核中期報告前，好多民間團體都為呢班官員做評核，其中一個係「新力量網絡」。研究員方志恒尋日喺電台節目提出一項驚人嘅統計，原來咁多個政治助理喺過去兩年加埋都只係出席咗三十五次立法會會議，最少嘅民政事務局政助徐英偉同有坡妹之稱嘅財經事務及庫務局政助伍潔鏇，佢哋只係出席咗兩次立法會會議，真係少到得人驚。
最勤力出席立法會會議嘅政助，係環境局嘅蔡少綿，一共出席咗八次；至於徐英偉同伍潔鏇除咗少出席會議之外，發言次數同樣不堪入目，同樣錄得「零」次嘅成績。
副局方面，最勤力去開會嘅係食物及衞生局副局梁卓偉，除出席咗四十次會議外，發言次數仲錄得四百一十九次，比第二位嘅環境局副局潘潔多出一倍。方志恒分析，官員勤力出席立法會會議，對自己嘅民望同公信力都有正面幫助。唔知班副局政助聽唔聽得入耳呢？