簡直係一針見血，羅范認同呢個係香港嘅大隱憂。羅范做咗全國人大代表，佢話呢三年喺內地睇咗好多嘢，尤其對內地官員嘅印象深刻，話內地官員係五加二、白加黑，即係一個禮拜做足七日，由天光做到天黑，兼且問責程度好高㗎。反觀依家嘅特區政府，羅范話都戥啲官員辛苦，因為佢哋愈做愈錯，愈做民望愈低，反而唔做唔錯，民望就高。

暗示比唔上內地官員

嘩！羅范係咪即係話特區政府嘅官員比唔上內地官員？呢點佢冇講清楚，但好明顯佢係意有所指，話有啲官係懶豬，放軟手腳唔做嘢，咁就要鞭吓佢哋喇！

羅范又話，市民對政策嘅反應有不可預測嘅情況，好似當年母語教學就係咁嘞，所以依家嘅官唔可以為掌聲而做嘢，推出嘅政策要有平衡點。但佢都補多句，強勢政府同弱勢政府要取得平衡點嘅方法係有唔同嘅。

依家嘅特區政府好明顯係超弱勢，唔單止啲官喺政策上攞唔到平衡，甚至係倒行逆施，否則點會搞到民怨沸騰吖！