俄羅斯近期有大山火，造成首都莫斯科近百年嚟最嚴重嘅空氣污染，有國家甚至發出旅遊警告，呼籲國民唔好去當地旅行。國泰航空企業事務董事莊偉茵喺自己公司旗下刊物《國泰天地》寫咗篇遊記，透露早前十幾個朋友組團去當地旅行，玩足十日，好彩喺火災發生前已返咗香港。佢對今次俄羅斯之旅十分滿意，美中不足係，佢遇上當地一百三十年嚟最酷熱嘅夏天，氣溫屢創新高，加上無遮無擋，所以被迫不斷搽防曬。
雖然做足預防措施，佢隻手仍然曬到皮膚敏感，仲要日日食雪糕解暑。好彩天氣酷熱流汗多，體重不增反減，連佢都話賺咗！
除咗遊莫斯科，莊偉茵此行仲去過聖彼得堡。佢話當地天空好藍，令人好舒服；地鐵站仲好乾淨整齊，甚至比英國更好，每一個站都好有特色，可惜時間有限，佢只去咗四個站。佢又大讚當地食物豐儉由人，每餐由港幣百幾蚊到過百蚊美金都有，點玩都得！