楊孫西旗下武夷山香江茶業出產嘅頂級野生大紅袍享譽盛名，做得呢行肯定對茶葉認識非淺。原來佢自幼喺鄉下已跟長輩學飲茶，主要飲烏龍茶、鐵觀音、老松水仙等，來港後轉飲普洱、龍井，近年就迷上大紅袍。佢話香港每年人均茶葉消耗量為亞洲之冠，港人飲茶文化夠獨特，有創意又識飲，又識得將紅茶用嚟沖港式奶茶，而且喺香港仲可以搵到幾十年嘅陳年普洱茶餅添！

由於依家內地好多茶葉都經香港運到世界各地，亦有好多外國人嚟香港搵靚茶葉，楊孫西所以滿腹大計，計劃籌組一個「世界茶葉產銷聯盟」，以香港獨特嘅飲茶文化、豐富嘅銷售經驗同完善嘅知識產權法例，佢相信可令每年嘅茶展做得更國際化同更具代表性，只要集結官方、業界同組織等力量，定能搞好中國同香港茶業。

肥仔明都係識茶之人，平時最鍾意飲鐵觀音，仲要日日飲，即使外出工作都會帶定茶包。佢教路話買鐵觀音要買半發酵嘅，全發酵會有異味，仲話要貴價貨先至好飲。咁佢飲嘅鐵觀音有幾貴呢？佢竟然話唔知，因為係太太買喎！