喺尋日嘅茶敍中，佢忽然吹淡風，竟然話現階段泛民再派人參選對推動民主冇乜意義喎！袋巾傑分析，○七年要參選特首，係為咗帶出「有得睇、冇得揀」嘅訊息，等市民明白到制度嘅不公義之處。佢形容當年嘅運動非常成功，好多市民都了解呢個弊病，所以下屆再去為抬轎而參選，實在冇乜意義。

泛民百幾票成為籌碼

佢仲話無論建制陣營派幾多人參選，泛民唔出選都比較有利，因為大家都明白泛民完全冇贏面，不如用嚟做籌碼就算。如果最後有兩個建制派出嚟選，雙方都為咗高票當選，泛民嗰百幾票就好重要，到時就可以要求承諾有多啲民主、民生政策；就算到時都係得番一個人出嚟選，泛民唔參選，更加可以彰顯制度不公，相信市民眼睛雪亮，引起嘅回響仲大咁話。

之不過，白鴿黨前日先講咗唔會放票畀袋巾傑，其實佢係咪驚唔夠票先轉口風咋？袋巾傑就唔肯正面回應，只係話任何人有意參選，都要爭取最多嘅選委支持，所以唔想太多假設無限上綱喎。背後含義係乜，各看官就要自己參詳嘞！

吼住公文袋黨魁一職

雖然佢唱淡選特首，但對公文袋黨魁一職興致勃勃，講起未來黨魁要面對嘅新挑戰好似宣布參選政綱咁。佢話依家泛民有三大陣營，包括公文袋、激進啲嘅社民連，同埋逐漸走向建制嘅白鴿黨，未來黨魁嘅重點工作係要諗吓點喺各個選舉中同其他兩個陣營協調，爭取最多席位，仲要處理政改本地立法嘅問題。

但現時公文袋黨章規定，一定要直選嘅立法會議員先可以選黨魁，如果黨章唔改的話，咁袋巾傑就要放棄超級區議會議席先可以做黨魁嘞！