群情洶湧之下，政府只好做番場大龍鳳，首先成立以政務司司長唐英年為首嘅樹木管理專責小組，仲喺發展局設立樹木辦，然後就係威係勢咁開展全港樹木大檢查行動，重點係對人流、車流比較多嘅區域做風險評估。後來好快就話大功告成，仲話全港千幾棵需要重點保護嘅樹木，只有兩百棵有問題。

照佢哋咁講，咪一天都光晒？睇怕以後都唔會再發生樹毀人亡嘅事喇啩。之不過，如果真係咁諗，就太傻太天真嘞，事關政府查樹不嬲馬馬虎虎，如果信晒佢哋嘅病樹名單，就死得人多咯。嗱，有樹博士之稱嘅香港大學地理學系講座教授詹志勇就直言，成千棵需要保護嘅樹至有兩百棵健康有問題，數字令人質疑。

查實全港各區有好多病樹危樹都冇列入名單，本報記者近日巡查咗一啲人流多嘅休憩處，就發現好多漏網病樹。好似馬鞍山郊野公園嘅梅子林有千幾棵樹，當中最少一成被白蟻蛀咗，或者被真菌侵蝕，有啲已經成棵枯萎。有幾棵細葉榕，輕輕刮一下樹幹上嘅泥土，就有成群白蟻湧出嚟，閒閒地有成千隻，成棵樹已經空晒心，得番個殼，一有風吹雨打就會冧低。

全港好多人來人往嘅地方都可以發現漏網病樹。粉嶺聯和墟休憩公園有棵大樹因為被真菌侵蝕，樹幹已經裂開，樹身有個大窿。上水港鐵站附近單車徑有棵闊葉樹兩年前已被風吹斷，但一直冇人理，現時樹身已傾斜，分分鐘會倒塌。

話時話，咁多病樹危樹都走漏眼，樹木辦究竟點驗樹㗎？唔通又係目測，睇兩眼就算？冇錯，佢哋就係靠肉眼驗樹。早排康文署工會踢爆，樹木辦成立後，署方要求員工驗樹，但又話冇乜特別就OK喎，檢查人員又唔使做詳細記錄，又唔使簽名，卒之檢完都唔知棵樹有冇事。咁搞法，有乜法子唔出事呀？叮！

其實，呢幾年砸死人嘅樹，有邊棵唔係啱啱檢查過呀？驗樹人員都實牙實齒話唔會有問題，點知話口未完就出事。

正如有立法會議員話齋，家陣啲危樹已經變成都市炸彈，分分鐘攞命。唔怪之得有家長話，日後帶細路去郊外踩單車一定要戴鋼盔嘞。其實，何止單車徑，港九新界任何一個地方，都遍布都市炸彈，戴鋼盔都會有着數。

政府咪話要發展新興產業振興經濟嘅，點解唔開發鋼盔產業呀？到其時七百萬人七百萬頂鋼盔，何愁冇生意。