早前鄭總約咗太平保險香港區總經理陳沛良喺呢度食午飯，兩人密斟下半年發展大計，尤其係出售民安（中國）一事已進入最後階段，梗要實啲。鄭總推介嘅佳餚之中，以罕見嘅鹹蛋豬腳薑最特別，估唔到鹹蛋同甜醋相遇後，鹹蛋嘅鹹味全消，咬落又比雞蛋鬆化甘香，別具風味。呢味傳統美食原來係已故中總榮譽會長葉若林引入嘅，甚受非富則貴嘅會董們歡迎。聽聞每周三立法會開會時，立法會議員黃宜宏梗會柯打幾煲同大家分甘同味。

鄭總嘅至愛仲有玫瑰燒鱔片同埋柚皮鵝掌，佢話立法會保險界議員陳健波都鍾意喺度食玫瑰燒鱔片，但亞洲保險總裁陳智思就鍾意落豉汁蒸，兩種食法各有千秋。