好鍾意去旅行嘅白鴿黨立法會議員張文光，今個暑假因為美孚嘅屋企大裝修，所以搬咗去汀九汀蘭居暫住，飽覽汀九風光當旅行。屋企今個月頭大變身，全權由張太負責，張文連間屋會變成點、使咗幾多錢都話唔知，一切由太太話事喎。
前排曼聯喺英格蘭社區盾大戰車路士，身為紅魔迷嘅張文滿心歡喜，買定薯片、啤酒等喺汀蘭居睇大戰，點知到開賽時間電視仲播緊體操，咁奇怪？佢經過一番查問之後，先發現原來根本睇唔到波。深深不忿嘅張文鍥而不捨，攞住部iPhone睇文字直播睇足九十分鐘，好在最後紅魔三比一大勝車仔，如果唔係佢可能好揼心。
iPhone畫面咁細，邊有睇大電視咁過癮，但係張文屋企下個月先裝修完，嚟緊幾個星期曼聯喺英超都有賽事，咁點算？真係恨到牙癢癢，惟有被迫落酒吧囉！張文正物色荃灣區有波睇嘅酒吧，實行一有波踢就去蒲吧，最多睇完搭的士返汀九。