明年舉行嘅區議會選舉被視為二○一二年立法會選舉嘅前哨戰，各黨各派都設法喺選舉寸土必爭。泛民喺協調過後，已各自劃好地盤，但近二百個被視為「建制票倉」嘅選區，有泛民黨派因唔想再屢戰屢敗，已決定棄戰。社民連吼準呢啲冇人爭嘅賣剩蔗，派出黨員去呢啲選區狙擊建仔，更鎖定三個選區重點出擊。
建仔「蔡菜子」蔡素玉喺東區錦屏扎根多年，上屆只得一名福建幫同佢撼，最後佢順利當選，社民連睇唔過眼，決定派曾向陳克勤掟胸圍嘅「飛bra男」錢偉洛落去同佢鍊過。明眼人都知「飛bra男」勝出嘅機會近乎係零，社民連擺明只係想玩嘢。
另外，社民連亦都打算派人狙擊鎮守中西區觀龍多年嘅葉國謙，同埋油尖旺富榮嘅鍾港武，但人選就未敲定。