協進會一開波就有咁多質疑同批評，之後再發現原來係雷聲大雨點小。協進會成立至今逾四個月做咗啲咩？只係聽過開過吓會，仲有就係開完會嗰日，身兼協進會副主席嘅李大壯就要回應中環租住嘅單位欠租四個月單嘢，而由佢揸旗嘅「香港—台灣商貿合作委員會」就更加冇影。

雖則係咁，港府尋日又突然宣布協進會又生多個BB，就係成立「港台文化合作委員會」，被委任入委員會嘅有十一個文化藝術同創意產業界人士，包括做召集人嘅亞洲演藝研究創辦人及總監毛俊輝，委員包括喺柏林影展攞咗水晶熊獎嘅《歲月神偷》嘅監製張婉婷、香江文化交流基金會主席江素惠等。

被揭發早前冷待台立委

其實喺協進會成立後，港台關係冇乜大改善，只係兩地政府官員互訪下，早前有班台灣立委訪港，政府鬼祟到只係喺新聞處發相交代幾句，仲被揭發冷待客人，客人話想參觀大學，教育局冇安排，只係畀咗聯絡電話人哋。加上有「香港—台灣商貿合作委員會」嘅前科，一啲成績都做唔到，點令人覺得「港台合作委員會」會有所作為呢？可見嘅將來，呢啲委員會轄下又會再下設多啲小組，換言之鬍鬚曾係咁生仔，只會畀人質疑係做門面工夫！