10/08/2010

播放本新聞相關短片

領匯掠水累街坊 長者買(食送)心慌慌

近排喺沙田新田圍邨,成日都聽到一啲公公婆婆唉聲嘆氣,有啲仲大鬧領匯冇良心,害人害物累街坊。因乜事班老人家咁勞氣呀?事關領匯接管屋邨街市之後,管理不善不特止,仲起勢加租,搞到班租戶冇啖好食,好多都頂唔順關門大吉。往時墟墟冚冚嘅街市,家陣十室九空,真係鬼影都唔多個。

街市一荒廢,新田圍邨居民嘅生活就亂晒龍。以前街市乜都有,各式肉類、菜蔬、副食品齊全,商場裏面仲有酒樓、糖水店、銀行,居民生活不知幾方便。但係家陣連菜檔都得番一兩檔,價錢又貴到飛起。居民唔想捱貴菜,惟有跨區去鄰近街市買餸。

條路話遠唔遠,話近唔近,後生仔都要行十幾二十分鐘,嗰班七老八十嘅公公婆婆行起嚟就心慌慌咯。嗱,有個八十歲嘅鍾伯去鄰近街市買餸,半路跌咗一交,跌傷大腿,住咗幾個月醫院,家陣仲要撐住支拐杖行路。

八十五歲嘅張婆婆仲慘,佢本來就周身病,又有糖尿病,又有高血壓,但係日日都要跨區買餸,仲要行八十幾級樓梯。近排天氣酷熱,老人家就辛苦嘞,有人熱到暈低,跌傷塊面同手掌,要送院治療,依家啲手指仲未伸得直。

唔講真係唔知,原來過去幾年當中,喺新田圍邨因為跨區買餸跌傷嘅公公婆婆就有三、四十個咁多,領匯咁搞法,你話係咪害人害物吖?班長者唔勞氣就假嘅。

其實,新田圍邨只係冰山一角咋。自從領匯接管屋邨街市之後,加租勢兇夾狼,莫講話菜檔、肉檔,就連酒樓、洗衣舖、成衣店,甚至私家醫生診所都頂唔順。以前屋邨居民無論食飯、飲茶、買衫、睇醫生都唔使出邨,要幾方便有幾方便,可惜家陣呢種生活已變咗集體回憶嘞,難怪好多老人家悶到患抑鬱症。

有團體近排抽樣訪問新田圍邨嘅長者,其中九成二受訪者每日都要跨區買餸,全屋邨一萬九千居民當中,有七千人係長者,咁即係話,有六千幾個公公婆婆都有機會好似鍾伯或者張婆婆咁喺路上出事。如果領匯仲只係掛住掠水,大鑊嘢陸續有嚟。

俗語有話,寧犯天條,莫犯眾憎,領匯做埋咁多陰騭事,搞到咁多公公婆婆周身傷,唔通一啲自責心都冇?家陣就話好彩未搞出人命啫,但唔會時時都咁夠運嘅,如果啲長者有乜三長兩短,睇吓領匯點樣收科。叮佢個鎯鎯!