三十五歲的陳任君外表嬌滴滴，卻擁有無比堅壯的愛心。她在東涌做社工，去年在東涌沙嘴頭碰見流浪唐狗「迪迪」，牠圍着阿君團團轉，對人很友善。流浪狗落在漁護署手中必死無疑，阿君遂花錢為「迪迪」絕育和申領狗牌，認做牠的主人。後來漁護署捕獲迪迪，控告阿君「在沒有牽引下容許狗隻出現於公眾地方」，認罪只會罰款數百元，但她拒絕屈服，今年七月被法庭重罰二千五百元。

放大圖片	放大圖片	放大圖片

家中收養15頭流浪貓

她的救狗義行被網民激讚，封她做救狗天使。現為「動物地球」幹事的她，家裏也收養了十五頭流浪貓，偏偏她拒認是「貓癡狗癡」：「我好反感畀人叫做貓癡狗癡，以前甚至唔係特別喜歡動物，由細到大，屋企都冇養過寵物，對動物最多係唔討厭囉。」

阿君從沒想過踏上動物義工之途，救狗只是出於不忍和被迫：「香港完全冇動物政策，漁護署只會管制動物，唔會尊重動物都係一條生命。我付出少少幫佢哋，但對流浪貓狗嚟講，已經係佢哋嘅全部。為動物絕育，再放回社區應該係政府責任，只係政府唔肯做，我哋先被迫去做！」

卸下天使的光環，阿君來自基層家庭，她是孻女，有兩個哥哥，她與母親感情要好，但與不顧家的父親關係疏離。阿君的媽媽是普通女工，知道阿君喜歡繪畫，死慳死抵供她到澳洲唸設計：「讀到第三年，媽媽病咗，我唔放心，於是返香港陪佢。」

她不想再離開母親，遂留在香港讀書：「我本身都鍾意做社工，讀唔成設計，讀社工都好呀。」

「動物都係一條生命」

回想起來，她從小已喜歡幫助弱小：「細個見到老婆婆推車仔、拎重嘢，我都會主動走去幫手。其實人同動物都係一條生命，做咗社工就更明白，無論你係孤兒定係冇飯開，政府都有資源去幫你，但流浪貓狗係弱勢之中嘅弱勢，冇人幫佢哋，就只有死路一條。」

陳任君

年齡：35歲

學歷：澳洲新南威爾士大學設計系文憑

　　　香港浸會大學社會工作系學士

現職：註冊社工

　　　動物義工

興趣：旅行、繪畫