拖咗成十年，西九文化區終於有嘢睇。西九管理局今個月二十號開始展開為期三個月嘅第二輪公眾諮詢，三名概念圖則顧問嘅設計會同時曝光，曾經設計出滙豐銀行總行同機場嘅Norman Foster，今次仲會親自現身解說添！
負責設計西九布局嘅概念圖則顧問一共有三位，除咗Foster之外，仲有嚟自荷蘭嘅Office for Metropolitan Architecture，同埋「本地薑」許李嚴建築師事務有限公司。為咗隆重其事，三間顧問公司嘅建築大師Foster、Rem Koolhaas同嚴迅奇，會一齊喺今個月二十二號假灣仔會展舉行嘅首場公眾論壇現身，親自介紹佢哋份設計。
Foster間Foster+Partners喺○一年以巨型天幕設計奪標，後來引起非議，加上西九單一招標令社會反彈，最終成個西九文化區計劃要推倒重來。今次Foster會帶啲咩驚喜畀大家，遲啲就會揭曉。