平時唔少議員會搞吓蛇宴、荔枝團等，同選民、街坊打成一片，但將返工地方變成景點都算係少數。最近甘威喺佢嘅網誌上召集由佢親自帶隊嘅觀賞團，將喺今個月十九號舉行，地點正正就係佢經常出入嘅立法會大樓。

甘威喺網誌嘅介紹話，由於位處添馬艦嘅立法會新大樓將會喺明年底啟用，呼籲市民把握最後機會，參觀有近百年歷史、中西合璧嘅立法會大樓，仲話參加呢個團可以感受一下置身立法會會議廳同宴會廳嘅滋味，兼且可以盡情影相。

咦！有啲蹊蹺喎！佢怒炒女助理事件搞到形象好負面，而立法會查呢單嘢仲未埋尾，唔通佢想藉住呢啲導賞團同啲市民親近啲，博好感洗底？

不過，呢條橋都值得政府參考一下，例如整番個「美利大廈觀賞團」或者「政府總部觀賞團」，甚至係「特首辦觀賞團」，總之人人都做導賞員，反正呢啲地方遲啲都會搬晒去新總部「門常開」，搞番個團拉攏市民，話唔定有助提升政府嘅民望呢！