呢排係上市公司公布業績嘅旺季，自稱「廠佬」嘅偉易達主席Allan黃子欣都啱啱交出份靚靚成績表。貴為《福布斯》富豪嘅佢，至愛嘅食肆竟集中喺大埔。
Allan家住港島半山區，每逢假期多數食住家飯，難怪佢話對港島嘅食肆唔係好熟悉，但佢辦公室喺大埔汀角路太平工業中心，多年嚟一直喺大埔搵食，反而對大埔嘅美食如數家珍。
講到大埔嘅醫肚熱點，佢首推大埔墟大明里嘅群記，必食之選係佢哋嘅招牌清湯牛腩河。提起大埔尋食記，佢愈講愈投入，盛讚大美督仲有好好味嘅泰國菜同意大利菜添！
開業八年嘅群記雖然外觀毫不起眼，入面亦僅容納到幾張枱，但唔少明星名人不惜長途跋涉入大埔，只求一試呢碗人人食完皆讚嘅清湯腩，皆因佢哋燉煮牛腩嘅方法獨步天下。群記營業時間唔長，只係由下晝一點開到夜晚八點，禮拜日休息，有時賣晒就即時收舖添！