潘佩璆尋日強調自己出戰港島未斷纜，指自己仔大女大，經濟再冇後顧之憂，自己嘅性格亦啱做講求利益平衡嘅政治工作，未來兩年會盡地一煲，催谷人氣博一鋪。不過，提起近期最熱嘅八達通出售顧客資料圖利風波，大家只會記得佢嘅盟友王國興；講最低工資，就諗起葉偉明；潘佩璆用乜嘢殺出重圍呢？佢嘅答案係：老本行，即係精神科專業服務。

近年香港接連發生精神病患者傷人事件，引起社會關注，好似前日竹園南邨就發生疑有精神問題嘅女子殺母後跳樓悲劇，但傳媒冇人諗起請教本身係聯合醫院精神科顧問醫生嘅潘佩璆，佢都承認以前太低調，以後會高調番啲，一發生同類事件，會主動開記者會回應，幫自己之餘亦可幫到人。