本文重點
尋日先講過海洋公園保育基金主席Judy陳晴前日為熊貓盈盈樂樂慶祝生日，見佢當時着住鬆身裙，懷孕傳聞不脛而走。雖然Judy怕羞唔認有喜，但外界早已經流傳呢一個消息，大家知道小妮子有喜，無不戥佢高興，海洋公園主席「扮嘢文」盛智文都乘機幽Judy一默話：「使乜怕尷尬，好多人都知喇！」
照樣幫手搬櫈
到底腹中塊肉是男是女，Judy話未去check：「呢個係上天畀我嘅禮物，男女都冇所謂。」問佢有冇Keep住檢查身體，佢答得好巧妙：「我不嬲都好關心身體！」
雖然唔想認，但佢嘅身形的確豐滿如孕婦，想話自己食肥咗都冇人信。前日出席活動時，佢不時用手叉腰，不自覺流露孕婦獨有嘅小動作；平時鍾意着高踭鞋嘅佢，前日都改着平底鞋。不過佢依然好親民，活動期間見工作人員搬櫈，都唔理咁多搬埋一份。